fanombohan’ny tambajotra nomerika “Mada business linkage” anatin’ny Programme SME/ BLP, tetikasa natao ho an’ny mpandrahara sy orinasa ara-dalàna eto Madagasikara. Tanjona ny mba hifankahafantarana bebe kokoa sy hahafahan’ny orinasa mifandray, mivarotra,… Mikarakara sy miahy an’io ny BLP na Business Linkage Program izay vatsian’ny BAD na ny Banky Afrikanina momba ny fampandrosoana vola. Nanomboka ny volana may 2020, manodidina ny 1,4 tapitrisa dolara ny vola natokan’ny BAD amin’izany. Efa nisy ny fanofanana ireo orinasa madinika sy salantsalany na PME manodidina ny 300 nandritra ny 2 taona, nentina nanamafisana ny traikefa, ny làlam-barotra, ny famatsiam-bola,… Manomboka ofisialy kosa ny tambajotra nomerika “Mada linkage program” izay hita amin’ny tranonkala na “site web”, ka nisantarana ny fampahafantarana ny teto Antananarivo, hitohy any amin’ny faritra mandritra ny volana ny oktobra, toa an’I Taolagnaro, Toamasina, Antsiranana, Mahajanga, Antsirabe, Fianarantsoa, Toliara, iarahana miasa amin’ny Antenimieran’ny varotra sy ny EDBM (Economic Development Board of Madagascar),... Ny orinasa ara-dalàna na “enterprises formelles” rehetra dia afaka misitraka izany avokoa. Mifototra amin’ny fampifandraisana ny orinasa sy ny mpandraharaha na “B2B” (Business to business) io. “Ahafahan’ny orinasa Malagasy mahita làlam-barotra rehefa mandeha ny fampahafantarana samihafa ny momba azy sy ny zavatra ataony, ny zavatra vokariny, hahafahany manitatra ny ambaidain’ny fandraharahana ataony sy mifakalo traikefa amin’ny orinasa hafa, mahita ireo orinasa mety mifameno aminy toy ny famatsiana akora fototra,...”, araka ny fanazavan-dRtoa Sandrine Rakotovao Sandrine Rakotovao, consultante mikarakara ny SME Business Linkage Program. “Tao anatin’ny fahafantarana fa tsy ampy eto Madagasikara ny fampihaonana ireo orinasa no antony nanaovana ny programa. Amin’ny alalan’ilay tambajotra, mety hisy ny fitomboana sy fifamenoana seha-pihariana, mety afaka hanatsara ny azy , afaka hampitombo ny seha-pihariana ka hampivoatra ny toekarena”, hoy I Eddy Randriamanjatosoa Chargée de Promotion Projet Mada Business Linkage.
Toky R
